rimatmag: Mo

Mo

mamalaybalay kadagiti uniberso ti naiburandis a rikna,
agkarkarawa iti sukog kadagiti nakabalaybay a parmata,
agil-ilus kadagiti sirok ken linged dagiti naiwalang a taberna
'ta tarigagay ti pitik, umapal kad' pay panagimas agpasikal nga ina?

nakabirkakak ti waw iti isit ti asi nga apagbiit;
ti ay-ay ket kamalala ti laylay ti lallay ti pait...
kadi, kaano, ngem, a koma adda kimat a manabsiit
iti sardam dayta langit ket maukas siglot ti siglom a bassit?

siglatam, siglatam, ingelam ta dinto ket met
agmarapampam, ukisam, ukisam 'ta nakasaluket
a pammarang; dim' bay-an, dim' bay-an a nakabalunet
dagiti pabutosan nga andingay ken agpakaikama a saet.

dimo ammo, dimo ammo ngem marmarbibi
dagiti kulagtit kadagiti inakilis a pagan-anay ti rabii;
kadagiti kissikissiw iti malem, adda nakapakleb a su-i
pauyon' uyot a di mapatgapatgan ti nakurapay la a kari.

ah, ngem, ah, ngem agpaut-ot ti uso iti puso iti baso
ngamin, ta ngamin dugos ti tugot ti paludip ti kimmampuso,
isu koma ta isu, isu, ngem sininglot ti tuso a kaso
ket napuri ti dugo ti limed, nagsanamtek ti amor ti duppo.


ROY V. ARAGON
St. Paul University
3500 Tuguegarao City




Kunkunada (2):
@November 24, 2004 at 8:40 AM ni Blogger asseng, kunana...

manong, ty kadagitoy dadduma a poste a. bareng no makawayaak ta pumanablaagakto manen ditoy.



@November 24, 2004 at 8:41 AM ni Blogger asseng, kunana...

ken ty itoy daniwmo.





Post a Comment



<< Parupa